بغلان کې د پیازو په کښت او حاصلاتو کې زیاتوالی راغلی
د بغلان دکرنې، اوبولګولو او مالدارۍ ریاست چارواکي وایي، چې په دې ولایت کې سږ کال د پیازو په کښت کې ۵ سلنه او د حاصلاتو په کچه کې ۱۴ سلنه زیاتوالی راغلی. د دې زیاتوالي اصلي لاملونه د وچکالۍ کمښت، د بزګرانو تجربې، د نویو میتودونو او عصري وسایلو سره اشنایي، او د اصلاح شويو تخمونو کارول بلل شوي دي.
تېر کال په بغلان ولایت کې په ۳ زره او ۳۲۹ هکتاره ځمکه کې پیاز کرل شوي وو، چې له هغه کښت څخه ۱۲۷ زره او ۹۷۴ مټریک ټنه حاصل تر لاسه شوی و. سږ کال په ۳ زره او ۴۷۰ هکتاره ځمکه کې پیاز کرل شوي، چې تمه کېږي ۱۴۵ زره او ۷۴۰ مټریک ټنه حاصل تر لاسه شي.
په بغلان کې د پیازو حاصلات هر کال د بزګرانو د کښت او اقلیمي بدلونونو په اساس بدلون مومي. سږ کال بزګرانو د اصلاح شویو تخمونو او نویو میتودونو په کارولو سره هڅه کړې چې د حاصلاتو کچه نوره هم لوړه کړي، په ځانګړي ډول د وچکالۍ د کموالي له امله یې د کښت کیفیت ښه کړی دی.
