د فراه ولایت یوشمېر بېوزلو کروندګرو کورنیو ته د نغدو پیسو مرسته وشوه
١٩ تله ۱۴۰۳ه.ش
٧ رَبِیعُ الْثاني ۱۴۴۶ه.ق
د فراه ولایت پشت رود ولسوالۍ کې ۱۱۶ بېوزلو کروندګرو کورنیو ته د اقتصادي پیاوړتیا په موخه نغده مرسته ورکړل شوه.
د فراه د کرنې، اوبولګولو او مالدارۍ ریاست په همغږۍ او د ډنمارکي کډوالو شورا (ډي،آر،سي) په تخنیکي همکارۍ سره، د فراه ولایت پشت رود ولسوالۍ کې ۱۱۶ بېوزلو کروندګرو کورنیو ته نغده مرسته ورکړل شوه. د دې پروژې په ترڅ کې، هرې کورنۍ ته ۶۷۰۰ افغانۍ ورکړل شوې، ترڅو د هغوی اقتصادي وضعیت ښه او د کور دننه د کار زمینه ورته برابره شي.
دا مرسته د بېوزلو او کونډو مېرمنو د اقتصادي ودې او د کار زمینې د برابرولو په هدف ترسره شوي دي، ترڅو په فراه کې کورنۍ وکولی شي له دغو امکاناتو څخه ګټه واخلي او د خپل اقتصادي وضعیت د ښهوالي لپاره هڅې وکړي.
