د محمدآغې ولسوالۍ پر یوشمېر فارم لرونکو د چرګانو دانې او اړونده توکي ووېشل شول
۲۳ وږی ۱۳۹۸
د لوګر د کرنې، اوبولګولو او مالدارۍ ریاست وایي، چې ددې ولایت د محمدآغې ولسوالۍ پر هغو ۲۵ فارم لرونکو چې ورته د غوښینو چرګانو فارمونه جوړ شوي دي د چرګانو دانې او د چرګانو روزنې اړونده توکي ووېشل شوې.
د لوګر د کرنې ریاست چارواکي وایي، دغه توکي چې د کرنې وزارت د بڼوالۍ او مالدارۍ ملي برنامې «NHLP» په همکارۍ پر دغو فارم لرونکو وېشل شوي دي په کې «د چرګانو ۶۰۰ کیلو ګرامه دانې، ۱۵ دانې اټوماټیک ابخورې، ۱۰ دانې ساده ابخورې، ۱۰ دانې ساده دانه خورې، ۲۰۰ ګرامه انټي بیوټیک درمل، یوه بوجۍ بور، د اخبارو یوه بسته کاغذ او شپږ متره پلاستیک شامل دي.
ددغو مرستو موخه د فارم لرونکو ملاتړ او په دې ولسوالۍ کې د غوښینو چرګانو د فارمونو ترویج دي.
