لوګر کې د جیوډیزیکي شبکو د نصبولو چارې پیل شوې

۲ تله ۱۴۰۲ه‍.ش
۹ ربیع‌الاول ۱۴۴۵ه‍.ق 
د لوګر د کرنې، اوبولګولو او مالدارۍ ریاست وایي، چې په دې ولایت کې د جیوډیزیکي شبکو رغنیزې چارې پیل شوي دي.
ددغو شبکو د چارې په پیل غونډه کې د لوګر ولایت مقام دفتر رییس مولوی میرویس وحیدالله سربېره دکرنې، اوبولګولو او مالدارۍ رییس مولوي سید امین هاشمی، د ښار جوړونې رییس مولوي مطیع الله ذاهد، د کرنې ریاست آمرینو او د کرنی، اوبولګولو او مالدارۍ وزارت څخه راغلي تخنیکي پلاوي کډون کړی وو.
په دې غونډه کې دلوګر ولایت دکرنې، اوبولګولو او مالدارۍ رییس د دغو شبکو په ارزښت خبری وکړی او ګډونوالو ته یی د  پرانستې مبارکي وویله او زیاته یی کړه، چې د دی شبکو په جوړېدو سره به د یاد ولایت دمرکز په ګډون ټولو ولسوالیو کې پراختیایي پروژې لکه سړک، د سړک اړونده پلونه، د اوبو بندونه، د اوبو کانالونه او همدارنګه استوګنیزې او سوداګریزو ودانیو په په معیاري ډول جوړولو کې به ترې ګټه پورته شي، تر څو د انجنیري سروې ګانو پرمخ ټولې پرتې ستونزې به د تل له پاره حل شي.
 د ولایت مقام دفتر رییس هم دغه اقدام نیک وباله او د ا.ا له مشرانو څخه یی مننه وکړه چې لوګر ته  پاملرنه کوی،او راغلی پلاوی ته یې د هر راز همکارۍ ډاډ ورکړ.
باید وویل شي، چې دغه شبکې به د لوګر ولایت په ولسوالیو کې هم نصب شي.