ننګرهار کې د متوازنې پراختیا او اغېزمنو پروژو د تطبیق په موخه د همغږۍ ناسته ترسره شوه

۱۴ تله ۱۴۰۵ هـ.ش
۲۳ رَبِیعُ الْثاني ۱۴۴۸ هـ.ق
د ننګرهار د کرنې، اوبو لګولو او مالدارۍ  رییس مولوي عبدالستار محمد په مشرۍ، د دې ادارې تر چتر لاندې له همکارو مؤسسو او تمویل کوونکو ادارو سره د اغېزمنو پروژو د ډیزاین، تطبیق، پرمختګ او متوازنې پراختیا په موخه تخنیکي کاري ناسته ترسره شوه.
په دې ناسته کې د کرنې او مالدارۍ په بېلابېلو برخو کې پر مهمو موضوعاتو خبرې وشوې. د کرنې رییس مسؤلینو ته سپارښتنه وکړه، چې د بزګرانو او مالدارانو لپاره د لا غوره خدمتونو د وړاندې کولو ترڅنګ، د پروژو په پلي کولو کې د خلکو اړتیاوې او لومړیتوبونه په پام کې ونیسي.
مولوي عبدالستار محمد د اوبو د ښه مدیریت، اصلاح شوو تخمونو د وېش، بڼوالۍ، د ځنګلونو پراختیا او ساتنې، حیواني خوراکې، واکسینونو، متوازنې پراختیا او لرې پرتو ولسوالیو ته د خدماتو رسولو په برخو کې د لا ډېرو هڅو او همغږۍ ټینګار وکړ، همدارنګه یې پر وخت د راپورونو وړاندې کول مهم وبلل.
نوموړي د همکارو مؤسسو له مسؤلینو سره د بشپړې همکارۍ او همغږۍ ډاډ شریک کړ.
په ناسته کې د ولایت مقام د خصوصي سکتور د برخې کارپوه محمد جمعه محمدي هم د اغېزمنو پروژو د تطبیق په برخه کې د همکارۍ ډاډ ورکړ.
ورپسې د مؤسسو مسؤلینو خپلې ستونزې، وړاندیزونه او غوښتنې له رئیس سره شریکې کړې، چې د حل په برخه کې یې د لازمې همکارۍ ډاډ ورکړل شو.
د ناستې په پای کې د «ستاسو غږ» مؤسسې استازي جان اغا نیازي دخپلو ترسره شوو پروژو په اړه د پریزنټېشن له لارې بشپړ معلومات وړاندې کړل.