پکتیا کې پر ۵۰۰ بڼوالو د لوبیا اصلاح شوې تخمونه ووېشل شول
۸ کب ۱۴۰۱ه.ش
۶ شَعبان المُعَظّم ۱۴۴۴ ه.ق
د پکتيا ولايت د کرنې، اوبو لګولو او مالدارۍ رياست اړوند د ځمکې او ځنګلونو د تلپاتې مدیریت پروژې له لورې د احمد ابا او سید کرم ولسوالیو کې پر ۵۰۰ بڼوالو د لوبیا اصلاح شوې تخمونه وېشل شوي دي.
په دې اړه جوړه شوې غونډه کې د پکتیا د کرنې، اوبولګولو او مالدارۍ ریاست اړوند د طبیعي سرچینو آمر زاهب الله ارسلا په ګډون د ځمکې او ځنګلونو د تلپاتې مدیریت پروژې مسئولینو او بڼوالو ګډون کړي وو.
د ځمکې او ځنګلونو د تلپاتې مدیریت پروژې استازی په خپلو خبرو کې وویل، چې د یادو تخمونو له ډلې څخه ۲۴۷ تنه بڼوالو ته په احمد ابا ولسوالی کې او ۲۵۳ تنه بڼوالو ته په سیدکرم ولسوالی کې د لوبیا اصلاح شوي تخمونه ورکړل شوي دي.
د پکتیا دکرنې ریاست د طبیعي سرچینو آمر زاهب الله ارسلا د ځنګلونو پر اهمیت خبرې وکړې او زیاته يې کړه ځنګلونه د چاپېریال په ساتنه کې مهم رول لوبوي، نوموړي په یادو ولسواليو کې له بڼوالو وغوښتل، چې د ځنګلونو د ساتنې په برخه کې دې د پکتیا دکرنې ریاست سره مرسته وکړي او د قطع کولو څخه جدآ مخنیوی وکړي.
