د ننګرهار کانال کړنې او لاسته راوړنې

د ننګرهار کانال رییس مولوي غلام الرحمن کظيم د رسنيز کنفرانس له لارې د کانال رياست لاسته راوړنې، روان، ترسره شوي او راتلونكو کارونو او پلانونو په اړه رسنيو ته معلومات ورکړه.
په دې رسنیز کنفرانس کې ښاغلی مولوی غلام الرحمن کظیم وویل: «زرجريبه هغه نااباده ځمکه چې د سېلابونو، زياتو اوبو راوتو او نورو ناخوالو له لاسه تخريب شوې وه د جوړولو چاري يې روانې دي، چې په کې فرعي ویالې،  استنادي پولې او نور هم شامل دي، چې د کرنيزو شرکتونو په همکارۍ جوړېږي» .
د ننګرهار دکانال رییس دغه راز د بڼوالۍ د پراختیا په برخه کې هم ددې ریاست د هلو ځلو په هکله وویل، چې په ۳۶۰ جريبه ځمکه د زیتونو بڼونه جوړېږي د هغه په خبره دا هغه ځمکې دي، چې پنځه لسیزه شاړې پاتې وې.
دغه راز د دې فارم په ۱۷۵۰۰ جریبه ځمکه کې د مالټې نوې بڼونه هم جوړېږي، چې  ۱۲۰۰۰ یې کرل شوي او ۵۵۰۰ نوریې نوې کرل کېږي.
د ښاغلي کظیم په خبره دکرکېیلي د میکانیزه کولو په پار هم په دې کانال کې یوشمېر کړنې ترسره شوي دي، چې له دې ډلې ۴۲۶ جریبه ځمکه کې د اوبه خور د څاڅکو سيستم جوړېږي هغه وویل:«په زياته برخه ځمكه يې د کرنې د ميکانيزه کولو او اوبو د سپما په پار دا سيسټم پلى شوى دی، په دومره لويه کچه لومړى ځل دى، چې په ټول افغانستان کې پلې کېږي».
مولوی عبدالرحمن کظیم دغه راز زیاته کړه، چې د کانال رياست په څلورګونو فارمونو کې شاوخوا ۲۳ زره د بېرې بوټي کرل شوي، چې ورسره به د بېرې مېوه ترلاسه او د شاتو مچيو کاروبار به  لا پياوړى شي.
ښاغلی کظیم وویل: «د ننګرهار کانال درې سترې قوريې لري (لومړي ، دوهم او درېيم فارمونو کې ) اوس موږ ديته اړتيا نه لرو چې له بازاره يا د بل چا /بلى قوريي نه بوټې واخلو».
د ننګرهار دکانال رییس دغه راز د زیتونو تېل په هکله هم له رسنیو سره معلومات شریک کړل هغه وویل: « تېرکال مو د زيتونو تېل اندازه ډېر لوړ وه، چې ۱۲۱ زره ليتره تېل ترلاسه شوې ده، دومره اندازه په تېرو څلور لسيزو کې نه و ترلاسه شوې، او امکان شته چې له هېواده بهر هم صادر شي.»
ددغو کړنو ترڅنګ د مالدارۍ په برخه کې هم ګڼې کړنې ترسره شوي دي، او یوشمېر یې تر کار لاندې دي، چې د کانال ریاست اړوند په ۳،۲ او ۴ فارمونو کې به د مالدارۍ ویجاړ شوي فارمونه بیا ورغول شي.
ښاغلی کظیم دغه راز وویل، چې د هډې فارم کې او د چرګانو روزنې فارم جوړولو چارې هم روانې دي او څلورو شرکتونو ته یې د فعالیت اجازه ورکړئ دی.
دغه راز د خرماوو بڼونو د پراختیا په پار هم پلانونه تر لاس لاندې دي مولوی عبدلرحمن کظیم وویل: «د کانال له خرماباغ څخه تېر کال شاوخوا اتلس ټنه خرما ترلاسه شوې وه، پلان لرو چې د خرماو بڼونه لا زيات کړو».
د ننګرهار دکانال رییس مولوی عبدالرحمن کظیم دغه راز زیاته کړه، چې د یاد کانال په ۴۰۰ جریبه ځمکه کې د غنمو اصلاح شوي تخمونه کرل شوي دي او دغه راز ددې ریاست اړوندو ځمکو کې ۱۰۱ بابه شنې خونې هم جوړې شوي دي.