هلمند کې د غصب مخنیو او غصب شویو ځمکو د بېرته راګرځولو کمېټې هڅې
۱۹ لېندۍ ۱۴۰۱ه.ش
۱۶ جمادي اﻷول ۱۴۴۴ ه.ق
د عالیقدر امیرالمؤمنين حفظه الله د ځانګړي حکم په اساس په هېواد کې د امارتي (سلطاني) عامه مرعي او وقفي غصب شویو ځمکو، د غصب مخنيوي او د غصب شویو ځمکو د بېرته راګرځولو کمېسیون ګمارل شوی دی چې، په ولایتونو کې د یاد کمیسون تر چتر لاندې د کرنې رییس په مشرۍ یو ګډ تخنیکي پلاوی تعین او په کارونو یې پیل کړی دی.
د هلمند په ولایت کې نوموړي تخنیکي پلاوی په مرکز لښکرګاه احمدشاهي مینې سیمه کې د شخصي او امارتي ځمکو بېلولو په موخه له سیمې څخه له نږدې لیدنه وکړه .
د هلمند د کرني ریس او د تخنیکي ټیم مشر مولوي عبدالباري (شهاب) وایي د احمد شاهي مېني په سیمه کي شاوخوا ۳ زره جریبه ځمکه شته، چي یوه اندازه شخصي او نورې یې دولتي امارتي ځمکي دي، چي د تثبیت لپاره یې ټاکل شوی تخنیکي ټیم کار کوي.
نوموړی وایي د احمد شاهي مېني په سیمو کي د مخکني حکومت ښاروالۍ د پلان تر تطبیق مخکې خلګو ته د ځمکو اوېزونه او نمرې ورکړي دي، موږ هڅه کوو چي شخصي او دولتي ځمکي بېلي کړو او راپور به یې د اصولو مطابق مربوطه لوړ رتبه کمېسیون ته وسپارو.
د چارواکو په خبره د یاد کمېسیون کارونه یوازې تر لښکرګاه پورې نه دي محدود، بلکې ټول هلمند پکښي شامل دی.
