د زابل مرستیال والي د شملزو ګمرک سیمې د تثبیت او ځمکو د استملاک لپاره راغلي پلاوي سره وکتل
د زابل مرستیال والي سلیمان آغا بهیر د ولایت مقام کې د شملزو ګمرک سیمې د تثبیت او ځمکو د استملاک لپاره د کورنیو چارو وزارت، د مالیې وزارت، د ښار جوړونې وزارت او د کرنې وزارت څخه د راغلي تخنیکي پلاوي سره په داسې حال کې وکتل چې دفتر رییس خواجه عبیدالله حافظ عتیق او د کرنې رییس مولوي عطاءالله راشد هم حضور درلود.
د راغلي تخنیکي پلاوي مشر انجنیر ظفر نظري وویل، چې راغلی پلاوی به د شملزو ولسوالۍ د ځنځیر سیمې ته سفر وکړي او هلته به د شملزو ګمرک لپاره ساحه تثبیت او د ځمکو د استملاک تخنیکي چارې به و ارزوي.
د زابل مرستیال والي سلیمان آغا بهیر د راغلي پلاوي په راتګ سره خوښي وښوده، زیاته یې کړه چې د شملزو ولسوالۍ د ګمرک جوړېدل د ټولو زابلي ولسونو اساسي غوښتنه ده او له راغلي پلاوي څخه یې غوښتنه وکړه چې خپلې چارې دې په پوره شفافیت سره په داسې ډول تر سره کړي چې په راتلونکي کې د ځمکو د تثبیت او استملاک په برخه کې ستونزې رامنځته نشي.
ښاغلي بهیر همدارنګه اړوندو ادارو ته لارښوونه وکړه چې د شملزو ولسوالۍ تر ځنځیر سیمې پورې دي د یاد تخنیکي پلاوي د انتقال او هلته د اوسېدو په برخه کې پوره همکاري وکړي.
