د PIN مؤسسه په د میدان وردګو ولایت کې سېلاب ځپلو سره مرسته کوی

۲۶ وږی ۱۴۰۱ه‍.ش
۲۰صَفَرالمظفّر ۱۴۴۴ ه‍.ق
د میدان وردګو ولایت دکرنې ریس مولوی عبدالجبار خالد د PIN مؤسسې د مرکزي دفتر استازې ډاکټر سیما جاوید او ورسره راغلي پلاوي د میدان وردګ ولایت له والي الحاج محمد امین عمري سره په لیدنه کې په دغه ولایت کې له سېلاب ځپلو کورنیو سره د مرستو او  پروژو پلې کېدو ژمنې وکړې.
د یادې مؤسسې استازې وویل: «موږ په جغتو او سیداباد ولسوالیو کې په بېلابېلو برخو کې پنځه پروژې تر کار لاندې لرو او په پلان کې لرو، چې  د ولایت په کچه د سېلابونو او جګړو له کبله زیانمنو کورنیو ته د کورونو جوړولو ترڅنګ د کانالونو، ویالو او کاریزونو د پاکولو پروژې پلې کړو».
په همدې حال کې د میدان وردګو ولایت دکرنې رییس مولوی عبدالجبار خالد د اوبولګولو په برخه کې، د پروژو په تړاو راغلی پلاوی ته د هر راز همکاریو ډاډ ورکړ او زیاته یې کړه، چې ورستیو سېلابونو دکرنې، اوبولګولو او مالدارۍ برخه کې ددې ولایت وګړو ته په زیاته پیمانه مالي تاوانونه اړولي دي او د یادو سېلاب ځپلو کورنیو لاس نیوی پکار دی .
دغه راز د میدان وردګو ولایت والي الحاج محمد امین عمري د PIN مؤسسې مسؤلینو ته د ښه راغلاست ترڅنګ وویل: «د دې ولایت خلکو له ډېرو اقتصادي ستونزو سره مخ دي او وروستیو سېلابونو په دغه ولایت کې ډېر ځاني او مالي زیانونه هم اړولي دي، چې ډېرو مرستو، استنادي دېوالونو او ذخیره وي بندونو جوړولو ته په ټولو ولسوالیو کې اړتیا ده.»
په ورته وخت کې د ولایت مرستیال شیخ شیراحمد حقاني د مؤسسې له مسؤلینو وغوښتل د یادو پروژو د پلې کېدو سروې د پېښو پر وړاندې د چمتوالي، کرنې، کډوالو چارو، سیندیزې حوزې، کلیو بیارغونې او پراختیا ریاستونو سره په همغږۍ ترسره کړي ترڅو په هغوسیمو کې، چې دغو پروژو ته اړتیا ده په ښه توګه پلې شي.