بغلان کې د رومي بانجانو سږني حاصلات ډېر شوي

۹ زمری ۱۴۰۱ ه‍.ش
۲ محرم الحرام ۱۴۴۴ ه‍.ق
د بغلان دکرنې، اوبولګولو او مالدارۍ رياست وايي، چې په دې ولايت کې د رومي بانجانو سږني حاصلات د تېرکال په پرتله دوه سلنه زیات شوي دي.
بغلان د رومي بانجانو کرکېلي لپاره مناسبه اوبه او هوا لري او په دې وروستیو کالونو کې، په دې ولایت کې د رومي بانجانو د ترویج په برخه کې اغېزناکې چارې تر سره شوي دي.
تېرکال د بغلان ولایت په ۸۹۸ هکټاره ځمکه رومي بانجان کرل شوې وه، چې له دغو کروندو څخه ۲۱ زره او ۶۳۰ مټریک ټنه حاصل ترلاسه شوې وه، خو سږ کال يې د حاصلاتو کچه دوه سلنه زيات شوي دي.
د بغلان د کرنې رياست کارکوونکي وايي، چې د تېر کال په پرتله د رومي بانجانو بيې هم لوړې دي د دوی په خبره تېرکال په همدې شپو او ورځو کې د بغلان ولایت مرکز پلخمري په ښار کې یومن رومي بانجان په ۴۰ تر ۶۵ افغانیو خرڅېدل. خو سږکال هر من یې له ۶۰ تر ۹۸ افغانیو خرڅېږي.
بغلاني بزګران دحاصلاتو زیاتوالي اصلي لاملونه رومي بانجانو د کرکېلي نوې لارې چارې او د اصلاح شو تخمونو استعمالو  بولي.
بايد وويل شي، چې د بغلان د کرنې ریاست د کرنیزو چارو آمریت کارکوونکو ددې ولایت بزګرانو ته د رومي بانجانو د کرکېلي نوې لارې چارې ښودلې دي.