میدان وردګو ولایت کې د یوشمېر کرنیزو پروژو چارې پیل شوې
۱۳لړم ۱۳۹۹
د میدان وردګو ولایت دکرنې، اوبولګولو او مالدارۍ ریاست له خوا په دې ولایت کې د زردالو وچولو د ۶۳ خونو او پر ۶۰ بزګرانو د مېوو راټولولو د بستو د وېش پروژه ددې ولایت د سیمه ییزو چارواکو په شتون کې پیل شو.
د میدان وردګو ولایت د کرنې ریاست چارواکي وایي، چې دغه پروژې د دې ولایت د مرکز په ګډون په اتو ولسوالیو کې پلي کیږي.
ددغو پروژو ټولیز لګښت ۲۰ میلیونه افغانۍ ده، چې دکرنې وزارت له پراختیایي بودیجې څخه ورکول کیږي.
یادې پروژې ددې ولایت د بڼوال د ملاتړ په پار پلي کیږي، چې په پلي کېدو سره یې ددې ولایت زردالو په ښه کیفیت سره پروسس او د کشتې تولید ته یې زمینه برابریږي.
میدان وردګ د مڼو ترڅنګ په پراخه کچه زردالو هم تولیدوي، چې د زردالو د وچولو د یادو خونو په جوړېدو سره به ددې ولایت د بڼوالو یوشمېر ستونزې هوارې او د دوی د حاصلاتو د خوساکېدو مخه به ونیول شي.
