د هلمند د لیمو د سوداګریزو بڼونو پایله مثبته ده
۲۶ چنګاښ ۱۳۹۹
د هلمند ولایت د کرنې، اوبولګولو او مالدارۍ ریاست وایي چې، په دې وروستیو کلونو کې په دې ولایت کې بزګرو ته د لیمو سوداګریز بڼونه جوړ شوي دي، چې دا مهال یې پایلې ښې او مخ پر وده روان دي.
د هلمند د کرنې رییس زلمی الکو وایي: «د هلمند خاوره اوبه او هوا دلیمو پالنې او روزنې ته مناسبه، ده په همدې موخه په پام کې لرو چې د کوکنارو د ښه بدیل په توګه د لیمو بڼونه ځمکوالو ته ور وپېژنو او ترویج یې کړو.»
ښاغلي الکو وویل په دې برخه کې د نمونې په ډول لسګونه جریبه ځمکه کې په توافقي ډول د لیمو بڼونه جوړ شوي، دي چې تر ډېره یې ښه پایله ورکړې ده.
د هغه په خبره د هلمند دکرنې ریاست په پام کې لري، چې د کرنې وزارت د بڼوالۍ اومالدارۍ ملي پروژې «NHLP» په همکارۍ سږکال هم ددې ولایت بزګرو ته د لیمو بڼونه جوړ کړي.
د هلمند دکرنې ریاست تمه لري، چې په دې ولایت کې د سټروسو کورنۍ لا ډېر پراخه شي.
د سټروسو د کورنۍ ډېری بڼونه د هلمند ولایت په مرکز لښکرګاه او ددې ولایت په ناوې او نادعلي ولسوالیو کې دي.
