پکتیکا کې د ځمکني توتانو کرکېلي ته د بزګرانو لېوالتیا

۲۳ غویی ۱۳۹۹
د پکتیکا د کرنې، اوبولګولو او مالدارۍ ریاست چارواکي وایي، چې په دې ولایت کې د ځمکني توتانو کرکېلي ته د بزګرانو او ځمکوالو لېوالتیا ډېره شوې، چې موخه یې په دې ولایت کې د ځمکني توتانو د کرکېلي دودېدل دي.
د پکتیکا د کرنې ریاست چارواکي وایي، چې په دې ولایت کې د ځمکني توتانو کرکېله ښه پایله ورکړې  او بزګر یې له حاصلاتو خوښ دي.
په پکتیکا کې د لومړي ځل لپاره ددې ولایت د مرکز ښرنه د نوي سرې کلا کلی او سیدونکی محمدآصف په خپله ځمکه کې د ځمکني توتانو کرکېله کړی، چې حاصل یې د قناعت وړ دی. 
محمدآصف له ایټالیا څخه ځکمني توتان راوړي او په امتحاني ډول روزلې وه، چې ښه پایله یې ورکړې وه. محمدآصف وایي، چې په دې ولایت کې د ځمکني توتانو ښه پایلې ته په کتو اوس یې د ځمکني توتانو ۸ زره نیالګي کرلي دي او د کال څلور فصله ورکوي، چې ۴۰۰ زره افغانۍ عاید تر لاسه کوي. محمدآصف وایي، چې دا مېوه په بازار کې ډېره کمه او تقاضا ورته ډېره ده او په بازار کې په ښه بیه  خرڅیږي. محمدآصف وایي، په پام کې لري، چې راتلونکې کې په نورځمکو کې هم ځمکني توتان وکري. هغه په نورو بزګرانو د ځمکني توتانو نیالګي هم خرڅوي، چې د ځمکني توتانو کرکېله په دې ولایت کې دود او کروندې یې زیاتې شي.