ننګرهار کې د کرنې او مالدارۍ خونه عملاً فعالیت پیل کړ
۲۲ مرغومی ۱۳۹۸
د ولسمشر محمد اشرف غني د حکم پر اساس د کرنې وزارت له لوري د هېواد په شپږو زونونو کې د کرنې او مالدارۍ خونې پرانستل کیږي، چې په ترڅ کې یې په ننګرهار کې عملاً دا خونه پرانستل شوه او خپل فعالیت یې پیل کړ.
د یادې خونې د پرانستې په مراسمو کې د ننګرهار د کرنې سرپرست رییس ډاکټر محمد ضمیر بهسودي، د سوداګرۍ رییسخالد ګردیوال، له کابله ورغلي پلاوي او په ختیځ کې میشت د کرنې او مالدارۍ شرکتونو مسولینو برخه اخیستې وه.
د ننګرهار د کرنې سرپرست ریس ډاکتر محمد ضمیر بهسودي په خپلو خبرو کې دا خونه د کرنې او مالدارۍ په برخه کې د ښې همغږۍ ، ستونزو د حل او چارو د لا ښه والي په برخه کې ګټوره وبلل.
ښاغلی بهسودي وویل، چې ددې خونې اداري چارې لپاره د مدیره هیئت په توګه ۱۹ تنه ټاکل شوي، چې دمګړۍ به د درې میاشتو لپاره په موقت ډول کار کوي او وروسته به ورته د ټاکنو د طرزالعمل مطابق ټاکنې ترسره شي.
د ننګرهار د سودا ګرۍ رییسخالد ګردیوال، د شرکتونو مسولینو او له کابله ورغلي پلاوي په خپلو خبرو کې وویل، چې په ګډه به کارکوي ترڅو د هېواد په کچه دا خونه یوه نمونه خونه وګرځوي.
