لغمان کې یوشمېر شنوخونو لرونکو ته د نباتي درملو شیندلو پمپونو مرسته ووېشل شوه
۷ مرغومې ۱۴۰۴ه.ش
۷ رَجَب المُرَجَّب ۱۴۴۷ه.ق
د لغمان د کرنې، اوبولګولو او مالدارۍ ریاست د پراختیایي بودیجې له لارې، د ۳۱۴ زره او ۸۰۰ افغانیو په ارزښت ۲۰ شنوخونو لرونکو ته د ۲۰ لیتره ټانکر او جنراتور لرونکي د نباتي درملو شیندلو پمپونو مرسته ووېشل شوه.
یاده مرسته د لغمان د کرنې رییس مولوي عبدالستار محمد، د کرنیزو چارو آمر انجنیر بریالی همدرد، او د بڼوالۍ مدیر انجنیر فرهاد رحیمي په حضور کې د مرکز مهترلام د شنوخونو مالکانو ته وسپارل شوه.
د یادونې وړ ده، چې دغه تجهیزات د کرنې، اوبولګولو او مالدارۍ وزارت د پراختیایي بودیجې پر مټ چمتو شوي دي او یوازې هغو شنوخونو لرونکو ته ورکول کېږي، چې د لغمان د کرنې ریاست سره ثبت او راجستر وي او رسمي اجازه‌لیک ولري.
په ورته مهال، د لغمان د کرنې رییس مولوي عبدالستار محمد له مستحقینو وغوښتل، چې له دې مرستې څخه سالمه او اغېزمنه ګټه واخلي، څو د شنوخونو تولید لوړ او کرنیز حاصلات ښه شي.
