د کندهار دوو ولسوالیو کې لس شنې خونې ګټې اخیستنې ته وسپارل شول
۲۷ لیندۍ ۱۴۰۴ هـ.ش
۲۷ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست په هڅو، د اروپایي ټولنې په مالي ملاتړ، د سولي بنسټ مؤسسې (آر.او.پي) په تخنیکي همکاري ددې ولایت د نېش او میوند ولسوالیو لپاره ۱۰ بابه شنې خونې جوړې او اړمنو بزګرانو ته وسپارل شول.
د یادو شنو خونو ګټه اخیستونکي ۵ تنه د نېش او ۵ تنه د میوند ولسوالۍ بېوزله بزګران دي، چې هره شنه خونه د ۴۰۵ متره مربع مساحت ځمکه کې جوړه شوې ده او ترڅنګ د اوبو د لویې زیرمې، قطري سیسټم، لمریزو هیندارو او اوبو ماشین سره مجهزه ده، ترڅو کرنه په عصري ډول پرمخ یووړل شي.
د دغو شنو خونو د جوړولو څخه موخه د بزګرانو اقتصادي ودې ته زمینه برابرول، د کوکنارو بدیل معیشت برابرول، د ژمي په موسم کې د سبو تولید ته زمینه برابرول، میکانیزه کرنه پراخول، او لیرې پرتو سیمو ته د کار زمینه برابرول دي.
بزګران له یاد اقدامه خوښ دي او د کندهار د کرنې ریاست او سولي بنسټ مؤسسې څخه مننه کوي، چې د کرنیزې پراختیا لپاره یې عملي ګامونه پورته کړي دي.
د یادونې وړ ده، څه باندې یوه میاشت وړاندې هم د کندهار د کرنې، اوبو لګولو او مالدارۍ ریاست په هڅو، د ملګرو ملتونو د پراختیايي پروګرام (یو.این.ډي.پي) په مالي ملاتړ، ۱۰۰ بابه شنې خونې په لوړ کیفیت جوړې او بزګرانو ته وسپارل شوې.
