د کونړ نورګل ولسوالی کې ۱۵ یتیمو کورنیو ته اصلاح شوې غواګانې ووېشل شوې

۹ لیندۍ ۱۴۰۴ هـ.ش
۹ جُمَادَى الثاني ۱۴۴۷ هـ.ق
د افغان یتیم پالنې خیریه مؤسسې استازو، د  کونړ دکرنې، اوبو لګولو او مالدارۍ ریاست د رییس مولوي محمد سرور صادق، د مالدارۍ خدماتو آمر سید احمدګل او مل پلاوي په ملتیا، د نورګل ولسوالی د مرستیال ولسوال، د کرنیزو خدمتونو مدیر او د سیمې د قومي مشرانو په حضور کې، د یادې ولسوالی ۱۵ اړمنو یتیمو کورنیو ته د اصلاح شوي نسل کونړۍ غواګانې ووېشلې.
د کونړ دکرنې رییس مولوی محمد سرور صادق په خپلو خبرو کې وویل، چې د دې وېش له برکته به د نورګل ولسوالی د ۱۵ اړمنو کورنیو اقتصادي ستونزې تر یوه بریده راکمې شي او دوی به د مالدارۍ له لارې دوامدار عاید ترلاسه کړي. نوموړي د افغان یتیم پالنې خیریه مؤسسې له استازو او تمویلوونکو څخه مننه وکړه او ټینګار یې وکړ، چې ټولې چارې د اسلامي امارت د اصولو له مخې او په بشپړې روڼتیا ترسره شي.
همداراز، د مالدارۍ خدمتونو آمر یادو یتیمو کورنیو او د نورګل ولسوالی نورو مالدارانو سره ژمنه وکړه، چې په راتلونکي کې به د حیواني خوراکي موادو د وېش په برخه کې هم لازمې همکارۍ ترسره شي.
دا په داسې حال کې ده، چې دغه ډول مرستې د بې‌وزلو کورنیو د اقتصادي پیاوړتیا ترڅنګ د مالدارۍ سکتور د ودې لامل هم ګرځي.