دکرنې وزارت پلاوي د هلمند له زېرمه شوو خوراکي غنمو څخه لیدنه وکړه

دکرنې، اوبولګولو او مالدارۍ وزارت یو تخنیکي او نظارتي پلاوي د هلمند ولایت د کرنې، اوبولګولو او مالدارۍ ریاست اړوند له هغو زېرمه شوو خوراکي غنمو څخه لیدنه وکړه، چې د خوراکي خوندیتوب او د اضطراري حالتونو لپاره ساتل کېږي.
په دغه لیدنه کې د هلمند د کرنې، اوبولګولو او مالدارۍ ریاست اړوند د خوراکي غنمو د ساتنې مؤظفې کمیټې غړيو هم حضور درلود، چې پلاوي ته یې د غنمو د ساتنې، کیفیت، وزن او د زېرمه کولو د بهیر په اړه لازم معلومات وړاندې کړل.
د لیدنې پر مهال د کرنې وزارت پلاوي د غنمو زېرمې وضعیت، د زېرمه ځایونو تخنیکي حالت، د رطوبت کنټرول، او د آفتونو د مخنیوي اقدامات له نږدې وڅېړل. هغوی د هلمند د کرنې ریاست مسؤلینو هڅې وستایلې او ټینګار یې وکړ چې د غنمو د خوندي ساتنې، د کیفیت د تضمین، او د دقیق حسابدارۍ په برخه کې لا ډېر پام وشي.
د کرنې، اوبولګولو او مالدارۍ ریاست مسؤلینو ډاډ ورکړ چې د غنمو د زېرمه کولو او ساتنې په برخه کې ټول لازم تخنیکي او وقایوي تدابیر نیول شوي، څو یاد غنم د اړمنو کورنیو د ملاتړ لپاره په مناسب وخت کې وکارول شي.