د روزګان والي د کرنې وزارت له پلاوي سره د چکډېمونو د پروژو په اړه وکتل

د روزګان والي مولوي عنایت‌الله شجاع د کرنې، اوبولګولو او مالدارۍ وزارت له يو پلاوي سره په خپل دفتر کې وکتل او د دې وزارت د چکډېمونو د پروژو په اړه یې مفصل بحث وکړ. والي ډاډ ورکړ چې د يادو پروژو د پلي کېدو په برخه کې به د ولايت مقام هر اړخيزه همکاري کوي.
ياد پلاوی چې د مولوي معاذالله په مشرۍ روزګان ولايت ته سفر کړی و، د کرنې وزارت د چتر لاندې د ناقيل سيمې د يو چکډېم د نظارت او د دهراوود ولسوالی د بل چکډېم د پرانيستې موخه یې درلوده.
په دغه ناسته کې د روزګان د کرنې رئيس مولوي عطاءالله راشد هم ګډون کړی و. د روزګان والي د پلاوي د راتګ هرکلی وکړ او زياته يې کړه، چې د اوبو د زېرمه کولو دا ډول پروژې د کرنې د پراختيا او د بزګرانو د سوکالۍ لپاره حياتي ارزښت لري.
د روزګان والي ټينګار وکړ چې د ولايت مقام به د کرنې وزارت له اړوندو پروژو سره بشپړه همکاري کوي، څو د اوبولګولو دا پروګرامونه په برياليتوب سره عملي شي او د خلکو اقتصادي ژوند ته مثبته اغېزه ورسوي.