ننګرهار کې د کچالو د صفر انرژۍ زېرمه تونونو رغنیزې چارې پیل شوې

۲۶ غبرګولی ۱۴۰۴ ه‍.ش
۱۹ ذُو الحِجَّةِ ۱۴۴۶ه‍.ق
د کرنې، اوبولګولو او مالدارۍ وزارت بزګرانو ته د اسانتیاوو برابرولو په پار د سړوخونو او صفر انرژۍ زېرمتونونو د جوړولو په لړ کې داځل د ملګرو ملتونو د خوړو او کرنې ادارې «اف.اې.او» په مالي او د اکشن اېډ مؤسسې په تخنیکي همکارۍ د ننګرهار ولایت د خوږیاڼو ولسوالی په لسو کلیو کې د کچالو د  صفر انرژۍ زېرمه تونونو رغنیزې چارې پیل کړي دي. دغه زېرمتونونه د اکشن اېډ مؤسسې په همکارۍ د ننګرهار دکرنې ریاست ترڅار لاندې جوړېږي.
د اکشن آیډ مؤسسې مسؤل انجینر  صفي الله  خلیلزی د ننګرهار د کرنې رییس مولوي محمد ولي محسن سره په ناسته کې وویل، چې هره زېرمه تون د لس مترو په  اوږدوالي، نهه متره پلنوالي او درې متره په ژوروالي د ۷۸۰ زره افغانۍ په  لګښت به جوړ او د ۳۵ ټنو کچالو د زېرمه کولو ظرفیت به ولري.
د ننګرهار د کرنې، اوبو لګولو او مالدارۍ رییس مولوي محمد ولي محسن د زېرمه تونونو جوړول د بزګرانو محصولاتو لپاره مهم ګام وباله او ددې ډول پروژو د زیاتولو غوښتنه هم وکړه .او همدارنګه د مؤسسې مسؤلینو ته یي په ټولو قانوني  برخو کې د همغږۍ او همکارۍ ډاډ ورکړ.
ښاغلی محسن وویل، چې دغه زېرمه تونونه به د سیمې بزګرانو ته د کچالو محصول د اوږدې مودې لپاره د ساتنې زمینه برابره وي، د حاصلاتو د ضایع کېدو مخه به ونیسي او بزګران به وتوانېږي خپل محصولات په مناسبه بیه بازار ته وړاندې کړي.
د ننګرهار د کرنې، اوبولګولو او مالدارۍ ریاست ژمن دی، چې د کرنیزو خدمتونو پراخولو ته دوام ورکړي او د بزګرانو ستونزو ته د حل لارې ومومي.
د چارواکو په خبره د زېرمتونونو جوړول په بازار کې د کچالو د بیو د ټیټوالي مخه نیسي او ددې لامل کیږي، چې بزګران د زېرمتون خاوند شي، او خپل محصولات هغه وخت په مناسبه بیه بازارته وړاندې کړي، چې بازار ورته اړتیا ولري. دغه زېرمتونونه د صادراتو په نه شتون کې د بزګرانو د زیان مخه نیسي.