د کندهار سپین بولدک کې د ۹۰۰ زره افغانیو په لګښت د اوبو رسولو کانال رغنیزې چارې ۸۰ سلنه پرمخ تللي

۲۵ غویی ۱۴۰۴ ه‍.ش
۱۷ ذُو ٱلْقَعْدَةِ ۱۴۴۶ه‍.ق
د کندهار ولایت سپین بولدک ولسوالی د ستون کاریز په سیمه کې د ۹۰۰ زره افغانیو په لګښت د اوبو رسولو یو کانال رغنیزې چارې ۸۰ سلنه پرمخ تللي او ډېر ژر به د ګټي اخیستنې ته وسپارل شي.
یاد کانال د کندهار د کرنې، اوبو لګولو او مالدارۍ ریاست په نوښت، د اقتصاد ریاست په همغږۍ، د ملګرو ملتونو د پرمختیایي پروګرام(یو،ان،ډي،پي) په مالي ملاتړ، او د طبیعي سرچینو آمریت تر مستقیم نظارت لاندې جوړ شوی دی.
د کندهار دکرنې ریاست د طبیعي سرچینو آمریت انجینر نورمحمد همکار وایي، چې دغه کانال ۷۷۵ متره اوږد، ۶۰ سانتي‌متره لوړ او ۶۰ سانتي‌متره پراخ دی، چې رغنیزې چارې یې د شاوخوا درېیو میاشتو په موده کې بشپړې شوې دي. نوموړي زیاته کړه چې د وروستۍ تخنیکي څارنې وروسته کانال د اوبو لګولو لپاره چمتو شوی دی.
د دې پروژې په ترڅ کې ۱۰ کسانو ته فني او ۵۰ کسانو ته غیرفني دندې هم برابرې شوې، چې د سیمه ییزو خلکو لپاره د مؤقتې اقتصادي زمینې برابرولو لامل شوی. 
د سپین بولدک ولسوالی اوسېدونکي د کرنې ریاست او (یو،ان،ډي،پي)  له هڅو څخه خوښي څرګندوي، چې په وینا یې دا ډول پروژې د دوی د کرنیزو اړتیاوو پوره کولو او د ژوند د کیفیت د لوړولو لپاره مهمې دي.
د یادونې وړ ده، چې یوازې یوه ورځ وړاندې هم په پنجوايي ولسوالی کې د کندهار د کرنې ریاست له لوري د ۳.۸ میلیونه افغانیو په لګښت د اوبو رسولو کانال جوړ او ګټې اخیستنې ته وسپارل شو.