د ننګرهار وادي کرنیز شرکت دویم فارم کې د ۱۷۰زره زیتون قلمو کرلو بهیر بشپړ شو
۲۶ وری ۱۴۰۴ ه.ش
۱۷ شَوّالُ المُکَرَّم ۱۴۴۶ه.ق
د ننګرهار وادي کرنیز امارتي شرکت په دویم فارم کې د زیتون ۱۷۰زره قلمو د کرلو بهیر د دغه فارم د مشرتابه او کارکوونکو د هلو ځلو په پایله کې په بریالۍ توګه بشپړ شو. دغه قوریه، چې په ۱۵ جریبه ځمکه کې جوړه شوې، د ننګرهار وادي کرنیز امارتي شرکت له مهمو تولیدي مرکزونو څخه شمېرل کېږي.
یاده قوریه نه یوازې د زیتون، بلکې د کلبید، یوکالیپټیس، مورفان، صبر، توت او نورو نیالګیو لرونکې ده، چې ۸ فني کارکوونکي پکې کار کوي. د نیالګیو تر څنګ، د فارم اړوند دوه‌نیم جریبه ښکلی پارک هم د قوریې مدیریت تر منظمې پالنې لاندې دی.
د فارم مسوولین وایي، چې په ۱۴۰۳ د مني او ۱۴۰۴ د پسرلي په موسم کې له همدې قوریې څخه ۴۸زره اصله زیتون نیالګي نورو فارمونو ته وېشل شوي، چې دا چاره د زیتون کرکېلي د پراختیا لپاره یو مهم ګام ګڼل کېږي.
تېره ورځ د فارم امر قاري احمدالله عرف اجمل، د کرنې مدیر او یو شمېر نورو مسؤولینو له قوریې لیدنه وکړه، روانو چارو ته یې کتنه وکړه او د لا زیاتو پرمختګونو هیله یې وښوده.
د یادونې وړ ده، چې دویم فارم د ننګرهار وادي کرنیز امارتي شرکت له مهمو میکانیزه فارمونو څخه دی. د اګرونومیکي ځانګړتیاوو له مخې د کال په اوږدو کې د بېلابېلو کرنیزو فعالیتونو وړتیا لري. دغه فارم څلور بلاکونه، قوریه، تخنیکي برخه، پراخه اوبه، د تفریح او سیاحت لپاره مناسب ځایونه لري.
