لغمان کې پر ۲۵۰ هکټاره د زیتونو نوي بڼونه جوړېږي
۲۰ کب ۱۴۰۳ه.ش
۱۰ رَمَضانُ المُبارَک ۱۴۴۶ه.ق
د لغمان دکرنې، اوبولګولو او مالدارۍ ریاست چارواکي وایي، چې د ملګرو ملتونو د خوړو او کرنې ادارې په همکارۍ ددې ولایت د مرکز مهترلام ترڅنګ د علیشنګ او قرغیو ولسوالیو پر ۲۵۰ هکټاره ځمکه کې د زیتونو بڼونه جوړېږي.
د لغمان دکرنې، اوبولګولو او مالدارۍ رییس مولوی عبدالستار محمد وویل، چې د دغو بڼونو د جوړولو په موخه پر یوشمېر بڼوالو د زیتونو نیالګي وېشل شوي دي، چې د دوی له خوا به په اړوندو بڼونو کې کښېنول شي.
ددغو بڼونو د جوړولو موخه د بڼوالو ملاتړ، په دې ولایت کې د زیتونو بڼونو ترویج او په ټوله کې ددې ولایت د بڼوالۍ سکټور ودې او پراختیا ته زمینه برابرول دي.
مولوی عبدالستار محمد وویل، چې د لغمان دکرنې ریاست هڅه کوي ترڅو دبڼوالۍ سکتور ته په دغه ولایت کې لاپراختیا ورکړي، په همدې موخه تر دې وړاندې هم په ۱۵ جریبه ځمکه کې د مالټو بڼونه جوړ شوي دي.
د لغمان دکرنې، اوبولګولو او مالدارۍ ریاست هیله لري، چې د بڼونو پراخوالي او د نویو بڼونو جوړېدو له لارې نه یوازې د سیمې اوسېدونکو ته د کار فرصتونه زیات شي، بلکې د زيتون تېل، اچار او نور تولیدات به په پراخه کچه نورو هېوادونو ته هم صادر شي.
