لغمان کې پر ۱۵ جریبه ځمکه د مالټو بڼونه جوړېږي
د لغمان دکرنې، اوبولګولو او مالدارۍ ریاست له پراختیایي بودیجې څخه په مهترلام، الینګار او علیشنګ ولسوالیو کې د مالټو ۱۵ جریبه بڼونو د جوړولو لپاره بزګرانو ته د مالټو نیالګي وېشل شوي دي.
د لغمان دکرنې، ابوولګولو او مالدارۍ رییس مولوي عبدالستار محمد وویل، چې ددې پروسې په لړ کې د لغمان په مرکز مهترلام کې پنځه، ۷ په الینګار او ۳ په علیشنګ ولسوالۍ کې وار دمخه د یادو ولسوالیو د سیمه ییزو کارمندانو له لارې انتخاب شوي وو،چې د بڼونو د ډیزاین په اړه د ترویج کارمندانو په همکارۍ وار دمخه لارښوونه شوي وه، چې نن ورته د نیالګیو پالنې او روزنې په برخه کې روزنیزه زده کړې سربېره هر بڼوال ته د یوه جریب ځمکې لپاره ۱۳۳ نیالګي او په ټوله کې ۱۵ بزګرانو ته (۱۹۹۵) نیالګي وېشل شوي دي.
د لغمان دکرنې ریاست هڅه کوي، ترڅو په مرکز او ولسوالیو کې د بزګرانو د ملاتړ لپاره ارزښت لرونکي فعالیتونه ترسره کړي، ترڅو بزګران وکولای شي، له کمې ځمکې څخه زیات حاصلات ترلاسه کړي او اقتصاد یې پیاوړي شي. دیادولو وړده تردې وړاندې هم دهمکارو مؤسساتو له لارې په دغه ولایت کې په سلګونو جریبه د ستروسو بڼونه جوړشوي دي.
