د ننګرهار وادي کرنیز امارتي شرکت رئیس د یوناما د ختیځ زون مشرې سره وکتل
۱۲ مرغومې ۱۴۰۳ه.ش
۱ رَجَب المُرَجَّب ۱۴۴۶ه.ق
ننګرهار وادي کرنیز امارتي شرکت عمومي رئیس سید محمد نعیم محمدي د ختیځ زون یوناما مشرې آغلې کرن لیګ کاسټ سره وکتل.
دا ناسته د یاد شرکت په مرکزي دفتر کې ترسره شوه، چې پکې د سوداګرۍ او بازار موندنې رئیس انجنیر ندي الله «نیازي»، د کرنیزو او تخنیکي چارو رئیس انجنیر محمد جمیل «خوشحال»، د مالي او اداري چارو رئیس محمداجان «راشد»، د یوناما د سیاسي برخې همکار نصیب ګل «مشال» او نورو ګډون کړی و.
په لیدنه کې آغلې کرن د یوناما د دفتر د فعالیتونو کړنلاره تشریح کړه. له بلې خوا، د ننګرهار وادي کرنیز امارتي شرکت مشرتابه د ننګرهار کانال د سترې او ملي پروژې په اړه او روانو پروسو په هکله بشپړ معلومات وړاندې کړل.
په پای کې د یوناما مشرې د شرکت د بېلابېلو برخو له نږدې لیدنه وکړه او د شرکت له مشرتابه سره یې د همکارۍ پر فرصتونو خبرې وکړې.
