د ننګرهار دره نور کې د اته زره امریکایي ډالرو په لګښت د یو سربند چارې بشپړ او ګټي اخیستني ته وسپارل شو

د ننګرهار د کرنې، اوبو لګولو او مالدارۍ ریاست سره په همغږۍ د افغانستان لپاره هالینډ کمیټې په تخنیکي همکارۍ او د اروپایي ټولنې په مالي لګښت د دره نور ولسوالی کشمنډ کلا کې د اته زره امریکایي ډالرو په لګښت د ګلبهار کانال سربند جوړ او ګټې اخیستنې ته وسپارل شو.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، یاد کانال چې زرګونه جریبه ځمکه ورلاندې خړوبېدله د سربند د خرابوالي او سېلابونو را وتلو پر وخت بزګران د ستونزو سره لاس او ګریوان وو، خو اوس د سربند په جوړېدو سره د ځمکو سربېره څارویو ته هم د اوبو منظم سیستم برابر شوي دي.
ښاغلي محسن زیاته کړه، چې د یاد سربند په جوړېدو کې  ۲۵ تنو ته د ۲۵ ورځو لپاره د کار زمینه هم برابره شوې وه.
د هالینډ کمیټي مسؤل داکتر رحیم الله سلیمی د کرنې رییس د همکارۍ مننه وکړه او د سربند جوړېدل یي د اوبو د ښه مدیریت او ضایعاتو مخنیوي اساس وباله او په راتلونکي کې د ورته پروژو د ډیزاین او تطبیق ژمنه وکړه.
د ګټي اخیستني په مراسمو کې د کرنې ریاست د احصایي، ارقامو او معلوماتو د تنظیم امر قاري سېلاب ذکریا، د طبیعي زېرمو او ځنګلاتو  امر قاري عبدالرحمن اتل، داکتر بحر الله او نورو چارواکو ګډون درلود.