په کندهار کې د ۳۷۰ کیلوګرامه بېکیفیته غوښو د قاچاق مخه ونیول شوه
۲۹ لړم ۱۴۰۳ه.ش
۱۷ جُمَادَى الأول ۱۴۴۶ه.ق
د کندهار د کرنې، اوبو لګولو او مالدارۍ ریاست د سپین بولدک ولسوالۍ د قرنطین مسؤلینو او امنیتي ځواکونو په همغږۍ د ۳۷۰ کیلوګرامه بېکیفیته او بېهویته د چرګ غوښو او جګر د قاچاق مخه ونیوله. دغه غوښې هڅه کېدله چې د سپین بولدک فرضي کرښې له لارې کندهار ښار ته راوړل شي او په خوراکي پلورنځیو، قصابیو او هوټلونو کې وپلورل شي.
د قرنطین مسؤلینو ویلي چې یو تن غوښتل دغه بېکیفیته غوښې او جګر کندهار ته انتقال کړي، خو د امنیتي ځواکونو په همکارۍ یې هڅه شنډه شوه.
د مالدارۍ آمریت له کندهاري ښاریانو، د خوراکي پلورنځیو او هوټل لرونکو څخه غوښتنه کړې چې یوازې تازه غوښې له قصابیو څخه وپېري او د چمتو شوې کوفتې او بېکیفیته غوښو له اخیستلو ډډه وکړي.
یاده دې وي چې په دې وروستیو کې د مالدارۍ آمریت او امنیتي مسؤلینو د بېکیفیته غوښو د قاچاق په وړاندې خپل اقدامات زیات کړي دي. تېره اوونۍ هم د سپین بولدک فرضي کرښه کې د ۴۵ کیلوګرامه بېکیفیته غوښو د قاچاق مخه نیول شوې وه.
