د کندهار ارغنداب کې د شنو خونو جوړېدو په اړه د کرنې مسؤلینو او مخورو مشرانو غونډه وشوه
۱۴ لړم ۱۴۰۳ه.ش
۲ جُمَادَى الأول ۱۴۴۶ه.ق
د کندهار ولایت د کرنې، اوبو لګولو او مالدارۍ ریاست په همغږۍ د ارغنداب ولسوالی د کرنې مسؤلینو د ولسوالۍ د ۱۰ حوزو مخورو مشرانو سره د شنو خونو جوړېدو په موخه د همغږۍ غونډه وکړه. په دې غونډه کې د شنو خونو لپاره د ځای ټاکلو او مستحقو بزګرانو د معرفي کولو په اړه خبرې وشوې او اړینې پرېکړې ونیول شوې.
غونډه د قران عظیم الشان په تلاوت پیل شوه او د ارغنداب ولسوالۍ د کرنې مسؤل حافظ احمد ټولو ته ښه راغلاست ووایه. هغه د درېیو ناحیو لپاره د شنو خونو د ځای ټاکلو او مستحق بزګرانو د ټاکلو په اړه د مشرانو څخه د پوره رڼې پروسې غوښتنه وکړه.
حافظ احمد د راتلونکو ژمنیو سیمینارونو، ورکشاپونو او روزنیزو پروګرامونو په اړه خپل نظریات هم شریک کړل او اړینې پرېکړې یې وکړې. د غونډې په پای کې مخورو مشرانو د کرنې ریاست د دې هڅې لپاره مننه وکړه او د پروسې په شفافیت یې خوښي څرګنده کړه.
یادونه باید وشي چې د کندهار ارغنداب ولسوالۍ په لومړۍ، دویمې او درېیمې ناحیو کې د کرنې ریاست په هڅو او د (یو.ان.ډي.پي) په مالي ملاتړ ۳ شنې خونې د غریبو بزګرانو لپاره جوړېږي، چې د سیمو د ټاکلو وروسته به یې د جوړولو چارې پیل شي.
