د کندهار بولدک کې د غواګانو پوستکي ناروغۍ ضد واکسین کمپاین پیل شو

۶ لړم ۱۴۰۳ه‍.ش
۲۴ رَبِیعُ الْثاني ۱۴۴۶ه‍.ق
د کندهار د کرنې، اوبو لګولو او مالدارۍ ریاست په هڅه او د ملګرو ملتونو د خوړو او کرنې نړۍوال سازمان (ایف. اې. او) په مالي همکارۍ، د کندهار په سپین بولدک ولسوالۍ کې د پوستکي ناروغۍ (Lumpy Skin Disease) د مخنیوي لپاره کمپاین رسماً پیل شو.
د دې کمپاین په ترڅ کې یو زر او ۵۰۰ ډوزه واکسین د یادې ولسوالۍ د کرنې، مالدارۍ او اوبولګو آمریت په تخنیکي همکارۍ، یو زر او ۵۰۰ غواګانو ته تطبیق کېږي. د پوستکي ناروغي چې یواځې په غواګانو کې ليدل کېږي، د شيدو د کمښت، پوستکي خرابوالي، د څارویو د مړینې او د څارویو محصولاتو د کموالي سبب کېږي.
د یادونې وړ ده، چې د پوستکي ناروغۍ لپاره د ټول کمپاین په اوږدو کې ۵۵ زره ډوزه واکسین چمتو شوی، چې په راتلونکو دوو میاشتو کې به د کندهار په ژړۍ، دامان، ډنډ، ارغنداب، پنجوايي، لوړ او کښته شاولیکوټ، لوړ او کښته میوند، سپین بولدک ولسوالیو او د کندهار ښار په ۱۵ ناحیو کې د مالدارۍ آمریت په تخنیکي مرسته تطبیق شي. تر دې وړاندې یاد کمپاین د کندهار ښار په دوو ناحیو کې په بریالیتوب سره پای ته رسېدلی دی.