هلمند کې د کورنیو شاتو ترویج په موخه هټۍوالو ته عامه پوهاوی ورکړل شو

د هلمند د کرنې، اوبولګولو او مالدارۍ ریاست له‌خوا د مرکز لښکرګاه لسګونو هټۍوالو ته د کورنیو شاتو د ترویج په موخه عامه پوهاوی ترسره شو. 
په دې عامه پوهاوي کې، هټۍوالو ته د بې کیفیته شاتو او هغو محصولاتو چې د معتبرې سرچینې تاییدي نه لري، د مخنیوي سپارښتنې وشوې. همدارنګه، د هلمند د باکیفیته او خالصو شاتو د پېرودنې او پلورنې توصیه وشوه ترڅو له یوې خوا کورنیو شاتو ته بازار موندنه وشي او له بلې خوا هلمندوالو ته صحي او کیفیت لرونکي محصولات وړاندې شي.
په دې وروستیو کې د هلمند کرنې ریاست د کورنیو شاتو د صنعت ترویج ته پاملرنه زیاته کړې او هڅه کوي چې د بهرنیو شاتو پر ځای، د ځایي شاتو تولید او استعمال ته وده ورکړي، ترڅو سیمه‌‌ییزو بزګرانو او هټۍوالو ته اقتصادي ګټه ورسېږي.