میدان وردګو کې پر ١٦ زره او ٥٠٠ بزګرانو د غنمو د اصلاح شويو تخمونو او کيمياوي سرو د وېش لړۍ پيل شوه

۱۴ تله ۱۴۰۳ه‍.ش
۲ رَبِیعُ الْثاني ۱۴۴۶ه‍.ق
د میدان وردګو ولايت د کرنې، اوبولګولو او مالدارۍ رياست له خوا د ملګرو ملتونو د خوړو او کرنې ادارې په مالي او د «سټارز» مؤسسې په تخنیکي همکارۍ ددې ولایت د مرکز میدان ښار ترڅنګ په نهو ولسوالیو کې پر ١٦ زره او ٥٠٠  اړمنو بزګرانو د غنمو د اصلاح شويو تخمونو او کيمياوي سرو د وېش لړۍ پيل شوه.
د غنمو اصلاح شوي تخمونو د وېش په مراسمو کې د میدان وردګو ولایت دکرنې رییس الحاج مولوی نیاز محمد عابد، د ملګرو ملتونو د کرنې او خوړو ادارې ولایتي مسوول فواد فرحت، د کرنیزو خدمتونو امر عید محمد ظاهري، د ولایت په کچه دسټارز مؤسسې دتوزیع مسول نقیب الله شهاب، د ولایت مقام استازو  او نورو مسؤلینو برخه اخیستې وه.
 د ملګرو ملتونو د کرنې او خوړو ادارې ولایتي مسوول فواد فرحت وویل، چې سږکال په میدان وردګو ولایت کې زرګونه بزګرانو ته د غنمو اصلاح شوي تخمونه او کیمیاوي سرې ووېشل کېږي، چې په مرکز میدان کې ۱۶۰۰ بزګرانو ته د وېش لړۍ پیل شوه. 
نوموړي زیاته کړه، چې د ملګرو ملتونو د کرنې او خوړو اداره د کرنې، اوبو لګولو او مالدارۍ وزارت تخنیکي همکار دی، او هڅه کوي د کرنیزو تولیداتو کچه لوړه کړي، تر څو د خوړو خوندیتوب رامنځته شي. نوموړی  د راتلونکي کال د پلان په هکله  وویل، چې د اصلاح شوي تخمونو، کیمیاوي سرو، حیواني خوراکي توکو او نورو اړوندو برخو کې به له بزګرانو او مالدارانو سره مرستې ووشي.
د کرنیزو خدمتونو امر عید محمد ظاهري، د اصلاح شوي تخمونو پر ارزښت او ګټو خبرې وکړې او بزګرانو ته یې د کر سپارښتنې هم وکړې. هغه وویل چې د میدان وردګو ولایت د کرنې ریاست  او دخوړو او کرنې سازمان د ژمنې سره سم،  د غنمو اصلاح شوي تخمونه او کیمیاوي سرې په مناسب وخت کي  توزیع کړل. 
د میدان وردګو ولایت دکرنې رییس مولوی نیاز محمد عابد وویل، چې د ياد پروګرام له تطبيق څخه يې موخه د اړمنو بزګرانو پر پښو اودرول دي، نوموړي له بزګرانو وغوښتل، چې پر خپلو ځمکو يې وکري، ترڅو اقتصادي وضعيت يې ښه شي.
د یادولو وړ ده، چې په نږدې ورځو کې به د نورو بزګرانو سروې هم وشي او د غنمو اصلاح شوی تخمونه او کیمیاوی سرې به ورته ورکړل شي.
د میدان وردګو ولایت د کرنې ریاست هر کال د خپلو همکارو مؤسسو په مرسته زرګونه بزګرانو ته د زیات حاصل ترلاسه کولو لپاره اصلاح شوي تخمونه، کیمیاوي سرې او کرنیز توکي توزیع کوي.