پکتیکا کې د ځنګلونو خوندیتوب په پار هڅې؛ د سروضي قومي مشرانو سره ناسته وشوه
۲۷ وږی ۱۴۰۳ه.ش
۱۴ رَبِیعُ الْأَوَّل ۱۴۴۶ه.ق
د پکتیکا دکرنې، اوبولګولو او مالدارۍ رییس مولوی صدر ددې ولایت د ځنګلونو او طبیعي سرچینو د خوندیتوب په موخه د هلوځلو په دوام د سروضې ولسوالی قومي مشرانو سره دځنګلونو د قطع مخنیوي په موخه ناسته وکړه.
ددې ناستې په ترڅ کې د پکتیکا دکرنې رییس په خپلو خبرو کې وويل، چې د ځنګلونو ساتنه د کرنې رياست له لومړيتوبونو څخه ده او چا ته اجازه نه ورکوي چې ددې ولايت ځنګلونه تخريب او له منځه ولاړ شي، نوموړي مشرانو ته په ټينګار سره وويل، چې هر څوک د لمدو لرګيو په پېر، پلور او قاچاق ونيول شول د قانون منګولو ته سپارل کېږي.
د پکتیکا دکرنې رییس له یادو قومي مشرانو څخه وغوښتل، چې د ځنګلونو په خوندیتوب او پراختیا کې دې دکرنې ریاست سره همکاري وکړي.
په همدې حال کې د سروضې ولسوالی قومي مشرانو د پکتیکا دکرنې رییس سره دهر اړخیزو همکاریو ژمنه وکړه.
