کامدېش ته د نورستان دکرنې رییس سفر
۱۰ وږی ۱۴۰۳ه.ش
۲۷ صَفَر المُظَفَّر ۱۴۴۶ه.ق
د نورستان ولایت د کرنې، اوبولګولو او مالدارۍ رییس مولوی شیر آقا پیر( حبیب الرحمن) په داسې حال کې، چې د کرنیزو چارو آمر محمد حنیف افغان، د څارویو روغتیا آمر ډاکټر بختیار سعید او د پلان او همغږۍ مدیر عنایت الرحمن صافی یې ملتیا کوله د نورستان ولایت کامدېش ولسوالی ته سفر وکړ.
ددې سفر په ترڅ کې د ځنګلونو خوندیتوب، د بزګرانو د ستونزو حل، د کرنې او مالدارۍ سکټور پراختیا په موخه له قومي مشرانو او چارواکو سره د لیدنې ترڅنګ د کرنې، اوبولګولو او مالدارۍ په برخه کې د روانو پروژو د چارو څارنه هم وکړه.
ددې سفر په ترڅ کې د کامدېش ولسوالی بزګرانو او مالدارانو خپلې ستونزې او ننګونې د نورستان د کرنې رییس ته وړاندې کړل، چې د کرنې رییس دوی ته د هراړخیزو همکاریو ډاډ څرګند کړي.
په همدې حال کې د نورستان دکرنې رییس د کامدېش ولسونو ته د ځنګل د سالمې استفادې طرحه تشریح او خلکو ته یې د ځنګل وهنې مخنیوي په برخه کې جدي سپارښتنې وکړې.
په ورته مهال د کرنې رییس ژمنه وکړه، چې د دوی ستونزې او غوښتنې به له ولایتی چارواکو، وزارت مشرتابه او همکارو مؤسسو سره د حل په موخه شریکوي.
