د کندهار ارغنداب کې د میلکو کمپنۍ سره د لبنیاتو ماشینونو مرسته وشوه
۶ وږی ۱۴۰۳ه.ش
۲۳ صَفَر المُظَفَّر ۱۴۴۶ه.ق
د کندهار دکرنې، اوبولګولو او مالدارۍ ریاست د «سي،اچ،اې» مؤسسې په همکارۍ ددې ولایت د ارغنداب په ولسوالی کې د میلکو کمپنۍ دوو څانګو سره د لبنیاتو د پروسس اړونده توکو مرسته وکړه.
د چاراکو په خبره ددې مرستې په ترڅ کې یادو څانګو ته د شېدو ټولولو ټانکۍ، چې هر یوه یې د دوه زره لیټره شېدو د ټولولو وړتیا لري او ترڅنګ یې دوه جنراټورونه، چې ۶۴ کیلواټه برېښنا تولیدوي او د شېدو د حرارت ساتلو په موخه ترې ګټه پورته کېږي ورکړل شوي دي.
ددې مرستې موخه د ارغنداب ولسوالی د میلکو کمپنۍ څانګو معیاري کول، د مالدارانو ملاتړ او په ټوله کې خلکو ته معیاري لبنیات و ړاندې کول دي.
