راستنېدونکو کډوالو ته درسېدنې په پار تورخم ته نږدې د دویم موقتي کمپ جوړولو چارې پیل شوې

۱۶ لړم ۱۴۰۲ه‍.ش
۲۳ ربیع‌الثاني ۱۴۴۵ ه‍.ق
له پاکستان څخه د اجباري ایستل شویو راستنېدونکو کډوالو وضعیت ته د رسېدنې کمیسیون پلاوي غړی او دکرنې، اوبولګولو او مالدارۍ وزارت مالي او اداري مرستیال مولوی فضل الباري فضلي په داسې حال کې، چې د ننګرهار والي ملا محمد نعیم اخند یې ملتیا کوله تورخم ته نږدې راستنېدونکو کډوالو لپاره د دویم لنډمهالې کمپ جوړولو چارې پرانیسته وکړه.
ددې لنډمهالې کمپ په پرانیست غونډه کې د ننګرهار والي حاجي ملا محمد نعيم اخند او د کرنې وزارت مالي او اداري مرستیال مولوي فضل الباري فضلي، د قمر خیریه بنسټ مشر الماس موند، د کرنې وزارت د عشر او زکات عمومي رییس مولوي شمس الله محمد، د ملي راډيو تلويزيون عمومي ریيس قاري يوسف احمدي، د کليو پراختيا رییس مولوي قسمت الله مبار، د عدلې ریيس مولوي فاتح الله فاتح، د کډوالو چارو رياست مسئولينو، د ولايت مقام وياند قاري قاضي ملا عادل او نورو مسئولينو حضور درلود.
یاد کمپ د قمر خيريه بنسټ په مالي لګښت تورخم ته نږدې لعلپورې سيمه کې د اويا کورونیو لپاره جوړېږي.
د قمر خيريه بنسټ مشر الماس مومند وويل، چې دوی په دې کمپ کې اويا کورونه جوړوي، چې احاطه، يو ۶ په څلورو کې د اوسېدو خونه، پخلنځی، تشناب او حویلۍ به ولري.
الماس مومند وايي، چې په يو کور شاوخوا ۲۲۰۰ امريکايي ډالر لګښت راځي چې هر کور په پاخه او اساسي ډول جوړېږي.
نوموړي وويل، چې دا کمپ به يو جومات، مدرسه، روغتيايي کلينيک، پارک او نور اړونده ملحقات هم ولري.
وروسته له هغه چې پاکستان له هغه هېواده د افغان کډوالو د اجباري شړلو د بشري قوانينو خلاف پرېکړه وکړه، هره ورځ د تورخم او کندهار له سپين بولدک بندر څخه زرګونه کسان افغانستان ته داخلېږي.
په همدې موخه د افغانستان اسلامي امارت د مشرتابه پلاوی په لارښوونه له پاکستان څخه د راستنیدونکو کډوالو لپاره د لازمو اسانتیاوو د برابرولو په موخه د امارت له څو ادارو څخه یو کمیسیون جوړ شوی دی، ترڅو له پاکستان څخه راستنېدونکو کډوالو لپاره لازمې اسانتیاوې برابرې کړي.