میدان وردګ  کې پر۱۱۵۰۰ بزګرانو د اصلاح شویو تخمونو او کیمیاوي سرو  وېشل لړۍ پیل شو

٢٢ تله ۱۴۰۲ه‍.ش
٢٩ ربیع‌الاول ۱۴۴۴ ه‍.ق
د میدان وردګو ولایت دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په همکارې ددې ولایت پر ١١٥٠٠ بزګرانو د غنمو د اصلاح شویو تخمونو او کيمياوي سرو وېش لړۍ پیل کړي دي.
ددغو مرستو د وېش لړۍ په پيل غونډه کې د میدان وردګو والي الحاج قاري بختيار معاذ، د ملګرو ملتونو د خوړو او کرنې ادارې استازې کاستوب دیوالي او یوشمېر نورو چارواکو ګډون درلود.
په یادو مرستو کې هر بزګر ته ۵۰کیلو ګرامه د غنمو اصلاح شوی تخم ۵۰ کیلو توره کېمیاوي سره او ۵۰ کیلو سپینه سره وېشل کېږي.
آغلې دیوالي د ولایت مقام له رهبرۍ او کرنې ریاست څخه مننه وکړه چې، د بشري مرستو په وېش کې یې له دوی سره پوره همکاري کړې او زیاته یې کړه، چې په تېرو دوه کلونو کې یې په میدان وردګ ولایت کې د یادې ادارې مرستې د تېر په پرتله دوه چنده شوې او په راتلونکي کې پلان لري، چې یادې مرستې لانورې هم ډېری کړې.
د میدان وردګ ولایت والي الحاج قاري بختيار معاذ راغلي پلاوي ته د ښه راغلاست تر څنګ له دوی مننه وکړه، چې د دغه ولایت له اړمنو خلکو سره مرسته کوي او ډاډ یې ورکړ چې دغه مرستې به په پوره شفافيت تر اړمنو خلکو پورې رسېږي.
ښاغلي معاذ د خوړو او کرنې نړیوال سازمان له استازو و غوښتل تر څو د اوبو مهارولو لپاره چک ډېمونه جوړ کړي له يوې خوا به کروندګرو ته د محصولاتو لپاره اوبه پیدا شي او له بل لوري به د سېلابونو را وتلو مخنیوی شوی وي.
په همدې حال کې د میدان وردګو ولایت د کرنې، اوبولګولو او مالدارۍ رییس له راغلي پلاوي څخه د مننې تر څنګ له دوی و غوښتل تر څو د دغه ولایت بزګرانو د محصولاتو لپاره سړې خونې او د مېوو او لبنیاتو د پروسېس  بسته بندۍ کار خونې جوړې کړي.
د دې مرستې د وېش موخه د بېوزله بزګرانو ملاتړ او په ټوله کې د دوی د کرنیزو محصولاتو زیاتوالي له لارې د دوی عوایدو زیاتوالي ته زمینه برابرول دي.