د کندز دکرنې ریاست:شمال ختیځ زون کې د کرنیزو تخمونو د تولید شرکتونو سره د همغږۍ غونډه دائره شوه
۳۰ وږي ۱۴۰۲ه.ش
۶ ربیعالاول ۱۴۴۵ه.ق
د کندز دکرنې، اوبولګولو او مالدارۍ ریاست چارواکي وایي، چې دکرنې وزارت د کرنې او مالدارۍ مرستیال مولوي صدراعظم عثماني په لارښوونه د کرنیزو تخمونو د تولید له شرکتونو سره په شمال ختیځ زون کې د کرنیزو تخمونو د پروسس په موخه د همغږۍ غونډه دائره کړه.
په دې غونډه کې د کندز د کرنې، اوبولګولو او مالدارۍ رییس الحاج مولوي امان الله حسن د دولتي شرکتونو آمرينو او د تخمونو د تولید د خصوصي شرکتونو رییسانو ته په خطاب کې وويل، چې د اصلاح شويو تخمونو په توليد کې له صداقت او اخلاص څخه کار واخلي، چې د هېواد بزګران ترې راضي شي. نوموړي همدا راز د تخمونو د تولید شرکتونو رییسانو ته لارښوونه وکړه، چې د خپلو تخمونو د پروسس بهیر چټک کړي او خپل ټول تخمونه په مناسب وخت د هېواد بزګرانو ته ورسوي، ترڅو تخمونه ضایع نه شي او بزګران یې په وخت وکري چې د دوی د حاصلاتو کچه لوړه شي.
ورپسې دکندز ولایت دکرنې ریاست د کرنيزو تخمونو د تصديق آمر د کرنيزو تخمونو د تصدیق پروسې د تخنیکي موضوعاتو په اړه خبرې وکړې او ویې ویل چې سږ کال په شمال ختیځ زون کې نږدې ۱۵ زره مټریک ټنه کرنيز تخمونه تولید شوي او د تصدیق لپاره یې ډاډ ورکړ چې د کرنيزو تخمونو د تصدیق آمريت ټول پرسونل ژمن دی، چې په ټاکلي وخت پروسس شویو تخمونو تصدیق کړي او شرکتونو ته یې لارښوونه وکړه چې د خپلو کرنيزو تخمونو د پروسس بهیر چټک کړي تر څو ټول کرنيز تخمونه په ټاکلي وخت د هېواد بزګرانو ته ورسېږي.
په همدې حال کې د تخمونو د تولید شرکتونو رییسانو په خپل وار د خپلو ستونزو او ننګونو په اړه خبرې وکړې، چې د کندز د کرنې، اوبولګولو او مالدارۍ رییس مولوي امان الله حسن د دوی ستونزې یاداشت او د حل په برخه کې یې د همکارۍ ژمنه وکړه.
