د ننګرهار کانال شرکت کې د چرګانو روزنې فارم جوړېږي
۳۱ زمری ۱۴۰۲ه.ش
۵ صَفَرُ المُظَفَّر ۱۴۴۵ه.ق
د ننګرهارکانال هډې فارم دویم بلاک کې په ۱۵ جریبه ځمکه کې د یو شرکت له خوا د اوه میلونه افغانیو ټولیز لګښت باندې د چرګانو روزنې ، تولید او دانې(د چرګانو دخوراکې) فارم جوړېږي.
د یاد شرکت یو تن مسوول حسیب الله وايي، چې د چرګانو په برخه کې کافي تجربه لري او د چرګانو روزني صنعت د پراختیا په پار غواړي چې په یاد فارم کې له ۳۰ نه تر ۵۰ زره پورې د هګیو چرګانې وروزي.
د ښاغلي حسیب په وینا دوی د یاد فارم د جوړولو په تعمیراتي چارو کې هره ورځ شل تنو ته د کار زمینه برابره کړې ده.
د معلوماتو له مخې په ننګرهار ولايت کې د چرګانو روزنې فارمونو وده کړې ، چې له ښه مرغه د چرګانو د خوراکي توکو اته توليدونکي فابريکې او د چرګانو د پېر-پلور دوه مارکيټونه شتون لري، چې د پانګوالو ستونزې يې تر یوه کچه هوارې کړي دي.
بل پلو د اقتصادي چارو د کارپوهانو په اند د کورني اقتصاد د پیاوړتیا په برخه کې په کور دننه د چرګانو روزنې صنعت او فارمونه کولای شي مثبت رول ادا او ځان بساینې په لور مزل چټک کړي.
