افتتاح کمپاین واکسین بیماری‌های لمپی‌سکن، طاعون و طبق در ولایت بغلان
ریاست زراعت، آبیاری و مالداری ولایت بغلان، به هدایت مولوی رحیم‌الله احدی رئیس این اداره و تحت سرپرستی داکتر تاج محمد احمدزی، آمر خدمات مالداری و صحت حیوانی، کمپاین واکسین بیماری‌های لمپی‌سکن، طاعون و طبق را آغاز کرد.
این برنامه با مشارکت تیم تخنیکی متشکل از داکتر شفیع‌الله ستانکزی، مدیر عمومی صحت حیوانی، داکتر لعل محمد محمدی، مدیر اپیدمیولوژی، و داکتران بخش ترویج مالداری و صحت حیوانی ولسوالی‌ها، به همکاری سازمان خوراک و زراعت ملل متحد (FAO) آغاز شد. کمپاین در ولسوالی‌های بغلان مرکزی، دندغوری، نهرین، برکه، فرنگ، دوشی، خنجان، تاله‌وبرفک و بنو اندرآب عملیاتی می‌شود.
برنامه واکسیناسیون شامل تطبیق ۸۰٬۰۰۰ دوز واکسین بیماری طاعون نشخوارکنندگان کوچک، ۳۰٬۰۰۰ دوز واکسین بیماری طبق، و ۵۰٬۰۰۰ دوز واکسین بیماری آبله جلدی گاوها است. این واکسین‌ها توسط ۴۰ داکتر مسلکی مسئول کلینیک‌های حیوانی در مرکز و ۱۵ واحد اداری ولایت بغلان بالای گاوها، گوسفندان و بزها تطبیق می‌شود.
این اقدام گامی مهم در جهت ارتقای صحت حیوانی و حمایت از مالداران در ولایت بغلان است.
