پکتیا کې د شاتو پلورنځیو څخه څارنه ترسره شوه
۲۹ غویی ۱۴۰۵ه.ش
۲ ذُو الحِجَّةِ ۱۴۴۷ه.ق
د پکتیا ولایت د کرنې، اوبو لګولو او مالدارۍ ریاست د یو ګډ تخنیکي کمیسیون په ګډون، د کرنې، اوبو لګولو او مالدارۍ وزارت د هدایت پر بنسټ، د مرکز ګردېز په یو شمېر د شاتو پلورنځیو (اټیو) کې د څارنې او ارزونې پروسه ترسره کړه.
یاده څارنه د بېکیفیته او غیرقانوني شاتو د پلور او استعمال د مخنیوي او همدارنګه د هغو شاتو د بازار څخه راټولولو په موخه ترسره شوه چې د وزارت اړوند لابراتوارونو د ټېسټ سند نه لري.
د ترسره شوې څارنې په پایله کې د مرکز ګردېز له یو شمېر پلورنځیو څخه شاوخوا ۲۳ کیلوګرامه بېکیفیته شات راټول او ضبط کړل شول.
د پکتیا د کرنې، اوبولګولو او مالدراۍ ریاست اړوند د ګټورو حشراتو مدیر شیراغا افضلي وایي، چې دا پروسه به تر هغه وخته دوام ومومي ترڅو د بېکیفیته او غیرمعیاري شاتو د پلور مخه په بشپړ ډول ونیول شي.
