د کندهار دوو ولسوالیو کې د نږدې ۱ زر ۳۰۰ پسونو د قاچاق مخه ونیول شوه 

۱۸ زمری ۱۴۰۴ هـ.ش
۱۵ صَفَر المُظَفَّر ۱۴۴۷ هـ.ق
د کندهار د  کرنې، اوبو لګولو او مالدارۍ ریاست تر رهبرۍ لاندې، د کندهار په سپین بولدک او ریګستان ولسوالیو کې د کرنې او مالدارۍ مسؤلینو او د افغانستان او پاکستان پر فرضي کرښه د افغان کنډک ویښو او بیداره مجاهدینو له لوري پاکستان ته د ۱ زر ۲۷۶ پسونو د قاچاق مخه ونیول شوه. 
د بولدک ولسوالی چارواکي وایي، چې د دغو  پسونو د قاچاق مخه د تېرې یوې اوونۍ په لړ کې په داسې حال کې نیول شوي، چې یو شمېر کسانو غوښتل یاد شمېر پسونه د ډیورنډ فرضي کرښې له لاري پاکستان هېواد ته انتقال کړي، چې په ورته مهال د مسؤلینو له لوري قاطع اقدام شوی او د یادو پسونو د قاچاق مخه ونیول شوه. د چارواکو په خبره د یاد قاچاق په تړاو یوشمېر کسان هم نیول شوي او اړوند ارګانونو ته سپارل شوي دي. 
د یادونۍ وړ ده، چې په دې وروستیو کې د قاچاقي څارویو د مخنیوی په موخه د کندهار د کرنې ریاست او کندهار امنیه قوماندانۍ هڅې زیاتي کړي، چې د یادو ګډو هڅو په دوام یې تر دې وړاندې هم په بولدک ولسوالی کې د ۲ زره ۴۰۰ پسونو د قاچاق مخه نیول شوې وه.