دکرنې وزارت د اراضۍ لوی رياست په مشرۍ د کونړ او نورستان ولایتونو د سرحدي ستونزو د حل په موخه د پلاوي سفر
د افغانستان اسلامي امارت د ریاست الوزراء عالي مقام د حکم په اساس د کونړ ولایت وټه پور ولسوالۍ د هوز کلي او د نورستان ولایت ودانت وایگل ولسوالۍ ارنس کلي اوسیدونکو ترمنځ د سرحدي سیمو او ځمکو به سر د رامنځته شویو ستونزو د هراړخيزې ارزونې په موخه یو ګډ پلاوي چې مشري یې د کرنې، اوبولګولو او مالدارۍ وزارت د اراضۍ ریاست د سروې کدستر رییس مولوي سید عبدالواحد هارون کوي او پکې د کورنیو چارو وزارت، د احصایې او اطلاعاتو ادارې او د قومونو او قبایلو چارو وزارت استازي شتون لري د يادې موضوع په تړاو ګمارل شوي دي.
یاد پلاوي لومړی کونړ او ورپسې نورستان ولایتونو ته د خپل سفر په ترڅ کې دیادو ولایتونو چارواکو سره په کتنه کې د يادې ستونزې د حل په موخه خبرې اترې وکړې.
په دې کتنه کې د کونړ والي مولوي قدرت اللّٰه ابوحمزه او د نورستان ولایت مرستیال والي مولوي فيصل احمد مختار ياد پلاوي ته د هر راز همکارۍ ژمنه وکړه او له ټولو مسوولينو څخه يې وغوښتل، چې د يادې موضوع په تړاو دې خپل هراړخيزې ارزونې وکړي او د دواړو ولايتونو سرحدي ستونزو ته د پای ټکی کېږدي.
