هندي سیال سره د افغانستان د کرنې وزیر لیدنه؛ د کرنې په برخه کې د همکاریو پر پراختیا ټینګار
۱۸ چنګاښ ۱۴۰۵ هـ.ش
۲۳ مُحَرَّمُ الحَرام ۱۴۴۸ه.ق
د افغانستان اسلامي امارت د کرنې، اوبو لګولو او مالدارۍ وزیر، مولوي عطاءالله عمري، د هند جمهوریت ته د خپل رسمي سفر په دوام، د دغه هېواد د کرنې او بزګرانو د هوساینې له وزیر، شیوراج سینګ چوهان، سره وکتل او د کرنې، اوبو لګولو او مالدارۍ په برخو کې یې د دوهاړخیزو همکاریو د پراختیا په اړه خبرې اترې وکړې.
دا لیدنه د هند د کرنیزو څېړنو په مرکز کې، چې په نوي ډیلي کې موقعیت لري، ترسره شوه. دواړو لورو د کرنیزو څېړنو، اصلاح شویو تخمونو، مالدارۍ، د اوبو د اغېزمن مدیریت او ګټورې استفادې، د نوې کرنیزې ټکنالوژۍ د لېږد، د ظرفیت لوړونې او د کرنیزو محصولاتو د سوداګرۍ د پراختیا په برخو کې د همکاریو پر پراخولو د نظرونو تبادله وکړه.
د افغانستان اسلامي امارت د کرنې، اوبو لګولو او مالدارۍ وزیر، مولوي عطاءالله عمري، د هند جمهوریت له مېلمهپالنې څخه د مننې ترڅنګ، د کرنې، اوبو لګولو او مالدارۍ په برخو کې د عملي همکاریو د پراختیا او د افغانستان د کرنیزو محصولاتو د صادراتو د زیاتوالي لپاره د افغانستان پر چمتووالي ټینګار وکړ.
د هند د کرنې او بزګرانو د هوساینې وزیر هم د افغانستان د پلاوي هرکلی وکړ او د دواړو هېوادونو ترمنځ یې د کرنې د ودې، د خوراکي خوندیتوب د پیاوړتیا، د تجربو او کرنیزو ټکنالوژیو د لېږد او د دوهاړخیزو همکاریو د دوام او لا پیاوړتیا پر اهمیت ټینګار وکړ.
