د ننګرهار ګوشتې ولسوالی کې بزګرانو ته د ناروغیو مخنیوي او د کروندو د ښه مدیریت په اړه روزنیز پروګرام ترسره شو
۲۸ چنګاښ ۱۴۰۵ هـ.ش
۴ صَفَر المُظَفَّر ۱۴۴۸ه.ق
د ننګرهار د کرنې، اوبو لګولو او مالدارۍ ریاست اړوند د ګوشتې ولسوالی د ترویج مدیریت کارکوونکو د ولسوالی په بېلابېلو کلیو کې بزګرانو او بڼوالو ته د کرنیزو ناروغیو د مخنیوي، د کروندو د اغېزمن مدیریت او د حاصلاتو د کیفیت د لوړولو په موخه روزنیز پروګرامونه ترسره کړل.
په دغو روزنو کې ګډونوالو ته د کروندو د منظمې اوبولګونې، د کیمیاوي او عضوي سرو د مناسب استعمال، د هرزه واښو د کنټرول، نرمکارۍ، د کورنیو درملو د جوړولو او د نباتي ناروغیو د څرګندېدو پر مهال د کیمیاوي درملو د خوندي او پر وخت استعمال په اړه عملي او نظري معلومات وړاندې شول.
همدارنګه بزګرانو ته د سبو د اصلاح شویو تخمونو د کرلو، د اوبولګونې د سمو لارو چارو، د ناروغیو د مخنیوي، د حاصلاتو د راټولولو، درجهبندۍ، بستهبندۍ، بازارموندنې او نورو اړوندو کرنیزو موضوعاتو په اړه هم هر اړخیزې لارښوونې وشوې.
د دې روزنیز پروګرام موخه د بزګرانو د مسلکي وړتیاوو لوړول، د کرنیزو ناروغیو او افتونو کمول، د باکیفیته او روغتیایي محصولاتو تولید، د بازار غوښتنو ته ځواب ویل او د بزګرانو اقتصادي پیاوړتیا او پر ځان بسیاینې ته زمینه برابرول دي.
د ننګهار د کرنې ریاست چارواکي ټینګار کوي، چې د ورته روزنیزو پروګرامونو دوام به د کرنیز سکتور په پرمختګ، د حاصلاتو په زیاتوالي او د بزګرانو د عاید په لوړولو کې مهم رول ولوبوي.
