د ننګرهار خوږیاڼو ولسوالی کې د حیواني کلینیکونو د فعالیتونو څارنه ترسره شوه
د ننګرهار د کرنې، اوبولګولو او مالدارۍ ریاست د مالدارۍ خدمتونو او څارویو روغتیا امر، مفتي عزیزالرحمن عزیز، په مشرۍ ګډ پلاوي د خوږیاڼو ولسوالی په بېلابېلو کلیو کې د یو شمېر حیواني کلینیکونو او وترنري درملتونونو څخه څارنه ترسره کړه.
یاده څارنه د مالدارانو لپاره د معیاري، خوندي او باکیفیته وترنري خدمتونو د وړاندې کولو، د حیواني روغتیا د خدمتونو د کیفیت د لوړولو او د نافذه قوانینو او مقرراتو د پلي کېدو په موخه ترسره شوه.
د څارنې پر مهال د حیواني کلینیکونو او درملتونونو بېلابېلې برخې وارزول شوې، چې په کې د بېکیفیته او تاریختېرو درملو تشخیص، د درملتونونو او کلینیکونو د پاکوالي ارزونه، د فعالیت جوازونو څېړنه او د وترنري خدمتونو د کیفیت ارزونه شامله وه.
د دې څارنې اساسي موخه د بېکیفیته او تاریختېرو درملو د پلور مخنیوی، مالدارانو ته د قانوني نسخو د ورکړې دودول، د خپلسرو او غیرقانوني درملتونونو د فعالیتونو مخنیوی او د غیرمعیاري درملو او واکسینونو د پلور او واردولو کنټرول دی.
د څارنې په پایله کې هغو کلینیکونو ته، چې د فعالیت جوازونه یې پای ته رسېدلي وو او یا یې قانوني جواز نه درلود، سپارښتنه وشوه، چې ژر تر ژره خپل جوازونه ترلاسه او یا یې نوي کړي.
همدارنګه وترنر ډاکټرانو ته لازمې سپارښتنې وشوې، څو په خپلو درملتونونو کې د غیرمسلکي کسانو له ګمارنې، د بېکیفیته درملو او واکسینونو له پلور او واردولو او هر ډول غیرقانوني فعالیتونو څخه په کلکه ډډه وکړي.
د ننګرهار د کرنې، اوبولګولو او مالدارۍ ریاست ژمن دی، چې د حیواني کلینیکونو او وترنري درملتونونو څارنه به په دوامداره توګه ترسره کړي، ترڅو مالدارانو ته معیاري او باکیفیته خدمتونه وړاندې شي، د حیواني روغتیا خوندیتوب ډاډمن او د مالدارۍ سکټور لا پیاوړی شي.
