د بڼوالۍ ځنځیري ارزښت د پراختیا پروژې له خوا په څلورو ولایتونو کې د ۱۸۶ ممیزخونو جوړول
۵ لیندۍ ۱۳۹۹
د کرنې، اوبولګولو او مالدارۍ وزارت اړوند د بڼوالۍ ځنځیري ارزښت د پراختیا پروژه «HVCDSP» د کرنیزو محصولاتو مدیریت د پروژې په اډانه کې د کابل، پکتیکا، لوګر او غزني په ولایتونو کې ۱۸۶ ممیزخونې جوړ کړي دي. ددغو ممیزخونو د جوړولو پروژه د کرنیزو محصولاتو مدیریت د پروژې په اډانه کې په لاره اچول شوې وه.
ددغو ممیزخونو له ډلې د ډېرو هغو رغنیزې چارې بشپړ شوي دي او د پاتې هغو چارې به هم د یوې اوونۍ په ترڅ کې بشپړ او ګټې اخیستنې ته به وسپارل شي. دغه ممېزخونې هر یوه یې په یوه وخت کې له ۱۲تر ۱۵ مټریک ټنه انګور په ممیزو بدلولای شي.
ددغو ممیزخونو د جوړولو ټولیز لګښت ۱۵۹ میلیون او ۴۴۵ زره او ۵۴۲ افغانۍ ده، چې ۸۰ سلنه لګښت یې د کرنې وزارت او ۲۰ سلنه لګښت یې د برخمن شویو بڼوالو له خوا تامین شوي دي.
