هغه کرنيزې زېربناوې چې د وروستي طبيعي پېښې له امله زيانمن شوي دي بيارغول کېږي
۲ چنګاښ ۱۴۰۱ ه.ش
۲۴ ذوالقعده ۱۴۴۳ ه.ق
دکرنې، اوبولګولو او مالدارۍ وزارت سرپرست وزير مولوی عبدالرحمن راشد، د پکتيکا د برمل په ولسوالۍ کې د زلزلې او وروستيو سېلابونو څخه له زيانمنو کورنيو سره د ليدنې په ترڅ کې له دوی سره ژمنه وکړه، چې د لومړنيو مرستو تر بشپړېدو وروسته هغه کرنيزې زېربناوې، چې په دې پېښه کې ويجاړې شوي دي بيارغول کېږي.
د کرنې وزارت سرپرست، چې د وروستيو سېلابونو او زلزلې زيانمنو کورنيو سره د مرستې په پار پکتيکا ولايت ته سفر کړی دی، له زيانمنو سره د خواخوږي په ترڅ کې له دوی سره ژمنه وکړه، چې د لومړنيو مرستو تر بشپړېدو وروسته چې په کې د خوراکي توکو او نورو لومړنيو تجهيزاتو وېشل شامل دي ارزونه کوي، چې په دې پېښه کې د اوبولګولو څو کانالونه، څو بڼونه او نور کرنيزې زېربناوې ويجاړې شوي دي، چې بيا ورغول شي.
زيانمنو کورنيو د اسلامي امارت د چارواکو له پر وخت پاملرنې او مرستې رسونې څخه مننه او قدرداني وکړه.
