ارزګان کې د کرنیزو محصولاتو مدیریت ۵۷ پروژې ګټې اخیستنې ته وسپارل شول

۲۵ مرغومې ۱۳۹۹
د ارزګان په ولایت کې د کرنې، اوبولګولو او مالدارۍ وزارت د کرنیزو محصولاتو مدیریت اړوند د ۵۷ بېلابېلو کرنیزو پروژو رغنیزې چارې بشپړې او ګټې اخیستنې ته وسپارل شول.
د ارزګان دکرنې رییس احمدشاه خیري وایي، چې د ۱۳۹۹یم کال په ترڅ کې ددې ولایت  د کروندګرو او بڼوالو د محصولاتو خوندي کولو او د دوی د عوایدو زیاتولو په پار ۷۲ پروژې پلي شوي دي، چې په کې د پیازو ۵۰ زېرمتونونه، د کچالو پنځه زېرمتونونه او د مڼو او انارو دوه صفردرجې سړې خونې جوړول او پر یوشمېر بزګرانو د مېوو او سبو ۱۵ لمریز وچوونکي دستګاوې وېشل شامل دي، چې له دې ډلې د ۵۷ پروژ چارې بشپړ او ګټې اخیستنې ته وسپارل شول.
د ښاغلي خیري په خبره ددغو پروژو ټولیز لګښت ۳۲میلیونه او ۷۹۳ زره او ۲۱۶ افغانۍ ده، چې د یوزر او ۵۸ مټریک ټنه کرنیزو محصولاتو د ساتنې وړتیا لري.
دارزګان د کرنې رییس وایي یادې پروژې، چې د کرنې وزارت له خوا طرحه او تمویل شوي دي، ددې وزارت د بڼوالۍ او مالدارۍ ملي پروژې له لارې او د کلیو د پراختیا یي شوراګانو په مرسته پلي شوي دي.
په هغه غونډه کې، چې په همدې موخه جوړه شوې وه، د  ارزګان والي محمد عمر شیرزاد،  د کرنې وزارت څخه مننه وکړه، چې ددې ولایت د کروندګرو او بڼوالو ستونزو ته پاملرنه کوي هغه  دغه راز د کرنیزو محصولاتو مدیریت د طرحې ستاینه یې وکړه او له بزګرانو یې وغوښت چې له یادو پروژو څخه په سمه توګه ګټه پورته کړي.