غزني کې د شاړو ځمکو د ابادولو او کرنیزو فعالیتونو د پراختیا هڅې ګړندۍ شوې
۱۴ لړم ۱۴۰۵ هـ.ش
۲۴ جُمَادَى الأول ۱۴۴۸ هـ.ق
د غزني ولایت د کرنې، اوبو لګولو او مالدارۍ ریاست د شاړو ځمکو د ابادولو، د کرنیزو فعالیتونو د پراختیا او د خصوصي پانګونې د هڅونې په موخه خپلې هڅې ګړندۍ کړې دي.
د دغو هڅو په لړ کې، د یوشمېر کرنیزو شرکتونو په ملتیا د زرګونو جریبو شاړو ځمکو د ابادولو پهپار په دې برخه کې خپل فعالیتونه پیل کړي دي.
د یادو شرکتونو له لوري د کرنیزو فعالیتونو په پراختیا سره به شاړې ځمکې پر حاصلخېزو کرنیزو ځمکو بدلې شي، د کرنیزو محصولاتو کچه به لوړه شي، زرګونو کسانو ته به د کار زمینه برابره او د کرنې په برخه کې به نوي او عصري سیستمونه معرفي شي.
د غزني د کرنې ریاست هڅه کوي، چې د دولتي ادارو او خصوصي سکټور ترمنځ د همغږۍ او ګډې همکارۍ له لارې د کرنې سکټور پیاوړی کړي، د کرنیزو ځمکو له شته ظرفیتونو اغېزمنه ګټه پورته کړي او د هېواد د خوراکي توکو د تولید په برخه کې د ځانبسیاینې لپاره لا ډېرې اسانتیاوې برابرې کړي.
د شاړو ځمکو ابادول او په کرنیزو ځمکو بدلول د کرنیز تولید د زیاتوالي، د کاري فرصتونو د رامنځته کېدو، د خصوصي پانګونې د پراختیا او د هېواد د اقتصادي ودې له مهمو لارو څخه دي. په دې برخه کې د خصوصي سکټور پانګونه، د عصري کرنیزو سیستمونو دودول او د دولتي ادارو ملاتړ کولای شي د کرنیزو سرچینو په اغېزمن مدیریت، د کورنیو تولیداتو په زیاتوالي او د خوراکي توکو د اړتیاوو په پوره کولو کې مهم رول ولوبوي.
